ഭക്ഷണം കഴിച്ച ഉടനെ കുളിക്കരുതെന്ന് വീട്ടിലെ മുതിര്ന്നവര് പറയുന്നത് നമ്മളില് പലരും കേട്ടിട്ടുണ്ടാകും. പ്രത്യേകിച്ച് ചൂടുവെള്ളത്തില് കുളിച്ചാല് ദഹനം മന്ദഗതിയിലാകുമെന്നും വയറുവേദനയും ദഹനക്കേടും ഉണ്ടാകാമെന്നുമാണ് പൊതുവേ പറയാറുള്ളത്. എന്നാല് ഭക്ഷണം കഴിച്ച ഉടനെ കുളിക്കുന്നത് ശരിക്കും അപകടകരമാണോ?. അതോ കാലങ്ങളായി കേട്ടുവരുന്ന ഒരു ആരോഗ്യവിശ്വാസം മാത്രമാണോ ഇത്?.
ഭക്ഷണം കഴിച്ചതിന് പിന്നാലെ കുളിക്കുന്നത് ദഹനത്തെ തടസ്സപ്പെടുത്തുമെന്ന് തെളിയിക്കുന്ന ശക്തമായ ശാസ്ത്രീയ തെളിവുകള് നിലവിലില്ല. അതുകൊണ്ടുതന്നെ ഭക്ഷണം കഴിച്ച ഉടനെ കുളിക്കുന്നത് എല്ലാവരും നിര്ബന്ധമായും ഒഴിവാക്കണമെന്നുള്ള കൃത്യമായ നിയമവുമില്ല. എന്നാല് ഭക്ഷണശേഷം ശരീരത്തില് നടക്കുന്ന ചില മാറ്റങ്ങള് മനസ്സിലാക്കുന്നത് സഹായകരമാണ്.
ഭക്ഷണം കഴിച്ചുകഴിഞ്ഞാല് ശരീരം അത് ദഹിപ്പിക്കുന്ന പ്രക്രിയ ആരംഭിക്കും. ദഹനപ്രക്രിയയ്ക്ക് ആവശ്യമായ പ്രവര്ത്തനങ്ങള്ക്കായി വയറിലേക്കും ദഹനനാളത്തിലേക്കും രക്തയോട്ടം വര്ധിക്കും. അതേസമയം ഭക്ഷണം കഴിച്ചതിന് ശേഷം ശരീരത്തില് ചെറിയ തോതില് ചൂട് അനുഭവപ്പെടുന്നതും സാധാരണമാണ്. പ്രത്യേകിച്ച് വലിയ അളവില് ഭക്ഷണം കഴിച്ചാല് വയര് നിറഞ്ഞതായും ശരീരത്തിന് ഭാരം തോന്നുന്നതായും അനുഭവപ്പെടാം.
ഇതിനിടയില് വളരെ ചൂടുള്ള വെള്ളത്തില് കുളിക്കുമ്പോള് ശരീരത്തിലെ രക്തക്കുഴലുകള് വികസിക്കുകയും ഹൃദയമിടിപ്പില് ചെറിയ മാറ്റങ്ങള് ഉണ്ടാകുകയും ചെയ്യാം. ചിലര്ക്ക് ഇതുമൂലം കുളിക്കുമ്പോള് അസ്വസ്ഥത അനുഭവപ്പെടാന് സാധ്യതയുണ്ട്. എന്നാല് ഇത് ദഹനത്തെ ബാധിക്കുമെന്നോ ഭക്ഷണം ദഹിക്കാതിരിക്കുകയോ ചെയ്യുമെന്ന് പറയാന് മതിയായ തെളിവില്ല.
ചൂടുവെള്ളത്തില് കുളിക്കുന്നത് ശരീരത്തിന് വിശ്രമം നല്കുകയും പേശികള്ക്ക് അയവ് നല്കുകയും ചെയ്യും. എന്നാല് വെള്ളം വളരെ ചൂടാണെങ്കില് ചിലരില് തലകറക്കം, ക്ഷീണം, അസ്വസ്ഥത തുടങ്ങിയവ ഉണ്ടാകാം. വലിയ അളവില് ഭക്ഷണം കഴിച്ച ഉടന് കുളിക്കുമ്പോള് വയര് നിറഞ്ഞിരിക്കുന്നതിനാല് ചിലര്ക്ക് കൂടുതല് അസ്വസ്ഥത തോന്നിയേക്കാം. പ്രത്യേകിച്ച് ഇതിനകം തന്നെ ആസിഡ് റിഫ്ളക്സ്, നെഞ്ചെരിച്ചില്, വയറുവീക്കം തുടങ്ങിയ പ്രശ്നങ്ങളുള്ളവര്ക്ക് ഭക്ഷണശേഷം ഉടന് കുളിക്കുന്നത് സുഖകരമല്ലാതിരിക്കാം.
അതുകൊണ്ട് പ്രശ്നം കുളിക്കുന്നതുകൊണ്ട് മാത്രം ഉണ്ടാകുന്നതല്ല. എത്ര ഭക്ഷണം കഴിച്ചു, എന്താണ് കഴിച്ചത്, വെള്ളം എത്ര കുടിച്ചു, എത്ര ചൂടാണ്, വ്യക്തിയുടെ ശരീരപ്രതികരണം എങ്ങനെയാണ് തുടങ്ങിയ കാര്യങ്ങളും പ്രധാനമാണ്.
ഭക്ഷണം കഴിച്ചതിന് പിന്നാലെ തന്നെ കുളിക്കേണ്ട സാഹചര്യമുണ്ടെങ്കില് വളരെ ചൂടുള്ള വെള്ളം ഒഴിവാക്കി ഇളംചൂടുവെള്ളത്തില് കുളിക്കുന്നത് കൂടുതല് സുഖകരമായിരിക്കും.വളരെ തണുത്ത വെള്ളം ഉപയോഗിക്കണമെന്ന നിര്ബന്ധവുമില്ല. ഭക്ഷണം കഴിച്ച ഉടനെ തണുത്ത വെള്ളത്തില് കുളിച്ചാല് ദഹനം കൂടുതല് നന്നാകുമെന്ന് തെളിയിക്കുന്ന ശക്തമായ തെളിവുകളും ഇല്ല.അതിനാല് കുളിക്കുമ്പോള് വളരെ ചൂടോ വളരെ തണുപ്പോ അല്ലാത്ത വെള്ളം തിരഞ്ഞെടുക്കുന്നതാണ് പ്രായോഗികമായ മാര്ഗം.
ഭക്ഷണം കഴിച്ചതിന് ശേഷം ഇത്ര സമയത്തിന് ശേഷം കുളിക്കണം എന്നുള്ള സമയപരിധിയെക്കുറിച്ചുള്ള വിവരങ്ങളും ലഭ്യമല്ല. ലഘുവായ ഭക്ഷണമാണ് കഴിച്ചതെങ്കില് സാധാരണയായി വലിയ അസ്വസ്ഥത ഉണ്ടാകണമെന്നില്ല. എന്നാല് വലിയ അളവില് ഭക്ഷണം കഴിച്ചിട്ടുണ്ടെങ്കില് കുറച്ച് സമയം കാത്തിരിക്കുന്നത് കൂടുതല് സുഖകരമായിരിക്കും.
പ്രത്യേകിച്ച് വയര് നിറഞ്ഞതായി തോന്നുകയോ നെഞ്ചെരിച്ചില്, വയറുവീക്കം തുടങ്ങിയ പ്രശ്നങ്ങള് ഉണ്ടാകുകയോ ചെയ്താല് ഉടന് കുളിക്കുന്നതിന് പകരം കുറച്ചുസമയം വിശ്രമിക്കുന്നത് നല്ലതാണ്.
ഭക്ഷണം കഴിച്ച ഉടന് കിടക്കുന്നത് ചിലരില് ആസിഡ് റിഫ്ളക്സ്, നെഞ്ചെരിച്ചില് എന്നിവ വര്ധിപ്പിക്കാം. പ്രത്യേകിച്ച് രാത്രി കട്ടി കൂടിയ ഭക്ഷണം കഴിക്കുന്നവര്ക്ക് ഇത് കൂടുതല് പ്രശ്നമാകാം. അതിനാല് ഭക്ഷണത്തിനും ഉറക്കത്തിനും ഇടയില് മതിയായ സമയം നല്കുന്നത് നല്ല ശീലമാണ്.
(ഈ ലേഖനം വിവരങ്ങള് നല്കുന്നതിന് വേണ്ടി മാത്രമുള്ളതാണ്. മെഡിക്കല് ഉപദേശത്തിന് പകരമാകില്ല. ആരോഗ്യ സംബന്ധമായ പ്രശ്നങ്ങള്ക്ക് ഒരു ഡോക്ടറുടെ സേവനം തേടേണ്ടത് അത്യാവശ്യമാണ്)
Content Highlights :Can you bathe immediately after eating? How much truth is there to the claim that bathing affects digestion?